Kolbeinn Kristinsson, formaður knattspyrnudeildar Fjölnis, hefur ákveðið að bjóða sig fram í varastjórn KSÍ en hann segir frá þessu í tilkynningu í dag.
Kolbeinn hefur öflugan bakgrunn í knattspyrnu en hann er uppalinn í Fjölni og á 48 leiki í deild- og bikar með félaginu en hann hefur einnig spilað fyrir Völsung, Björninn, Árborg, Aftureldingu. Í dag leikur hann með Vængjum Júpíters og hefur því spilað í öllum fimm deildunum.
Þar að auki hefur hann verið í fjölbreyttum verkefnum innan fótboltans. Hann hefur lokið stjórnendarnámi á vegum UEFA og setið í stjórn aðildarfélags síðastliðin sex ár.
Hann var kjörinn formaður knattspyrnudeildar Fjölnis á síðasta ári og hefur nú ákveðið að bjóða sig fram í varastjórn KSÍ.
„Ég hef ákveðið að bjóða mig fram í eitt þriggja sæta í varastjórn KSÍ á aukaþingi sem haldið verður 2. október nk.," segir Kolbeinn.
„KSÍ er leiðandi afl í íslensku íþróttalífi og ég vil taka að mér hlutverk í að byggja upp traust á sambandinu og vera hluti af sterkri heild," sagði hann ennfremur.
Framboð til stjórnar:
Ásgrímur Helgi Einarsson
Guðbjörg Fanndal Torfadóttir
Gullý Sig
Helga Helgadóttir
Þóroddur Hjaltalín (varastjórn)
Kolbeinn Kristinsson (varastjórn)
Framboð til formanns:
Vanda Sigurgeirsdóttir
Athugasemdir