Igor Thiago skoraði tvö á nokkrum mínútum
Benjamin Sesko opnaði markareikninginn með United
Leikur Brentford og Manchester United hefur farið nokkuð fjörlega af stað í Lundúnum en staðan er 2-1 fyrir heimamenn þegar lítið er eftir af hálfleiknum. Benjamin Sesko opnaði markareikninginn með United.
Brasilíski framherjinn Igor Thiago skoraði tvö mörk með stuttu millibili fyrir Brentford.
Fyrra markið gerði hann eftir langa sendingu Jordan Henderson fram völlinn. Harry Maguire reyndi að gera Thiago rangstæðan, en það heppnaðist illa. Thiago var réttstæður og komst einn í gegn á móti Altay Bayindir.
Afgreiðslan frá Thiago var hins vegar í heimsklassa, en hann skaut föstum bolta upp í nærskeytin og algerlega óverjandi fyrir Bayindir í markinu.
Sjáðu glæsilega afgreiðslu Thiago
Seinna markið kom eftir hálfgert skot frá Kevin Schade. Bayindir varði boltann út í teiginn á Thiago sem kom Brentford í 2-0.
Sjáðu annað mark Thiago hér
Heimamenn sköpuðu sér fullt af sénsum þar á milli, en United tókst að bíta frá sér með fyrsta marki slóvenska framherjans Benjamin Sesko.
Sesko fékk að vísu þrjár tilraunir til þess að skora. Hann átti skalla sem Caoimhin Kelleher varði, fékk frákastið sem Írinn varði líka, en á einhvern ótrúlegan hátt fékk Sesko annað frákast og þá kom hann boltanum í netið. Vafasamur varnarleikur hjá Brentford að leyfa Sesko að fá þrjú færi á nokkrum sekúndum.
Sjáðu fyrsta mark Sesko fyrir United
Annars var þungu fargi létt af Sesko sem hafði spilað sex leiki með United án þess að skora.
Athugasemdir
