Sky Sports greinir frá því að Kieran McKenna, þjálfari Ipswich Town, muni framlengja samning sinn við félagið á morgun.
McKenna er gríðarlega eftirsóttur eftir að hafa stýrt Ipswich úr League One, þriðju efstu deild enska boltans, og upp í úrvalsdeildina á tveimur árum.
Hann ætlar þó að blása á alla orðróma sem tengja hann við önnur félög með því að gera nýjan langtímasamning við félagið.
Ipswich er að ganga frá síðustu smáatriðunum fyrir undirskrift á nýjum samningi, sem verður tilkynntur á næstu 24 klukkustundum.
Það er ekki búist við neinum vandræðum á lokametrunum og verður gríðarlega spennandi að fylgjast með Ipswich reyna fyrir sér í úrvalsdeildinni eftir 22 ára fjarveru.
Athugasemdir
