Lestu um leikinn: Þór 2 -  0 Grindavík

Þór og Grindavík áttust við í fyrsta leik kvlödsins í Lengjudeildinni og var staðan markalaus eftir rólegan fyrri hálfleik. Þórsarar voru meira með boltann en Grindvíkingar fengu besta færi hálfleiksins skömmu fyrir leikhlé.

Heimamenn í Boganum skiptu um gír í síðari hálfleik og tók forystuna með auðveldu marki frá Rafael Victor eftir góðan undirbúning frá Ibrahima Balde.

Bæði lið fengu þó góð færi til að skora áður en Þórsarar tvöfölduðu forystuna með sjálfsmarki. Fyrirgjöf frá Sverri Páli Ingasyni fór af Haraldi Björgvini Eysteinssyni og rúllaði boltinn þaðan í netið.

Það var ekkert að frétta á lokakaflanum svo þægilegur 2-0 sigur Þórsara eftir tíðindalítinn leik er staðreynd.

Þór fer upp í þriðja sæti með þessum sigri, með 27 stig eftir 15 umferðir. Akureyringar stökkva yfir Þrótt R. og HK, sem eiga þó leik til góða.

Grindavík situr eftir í áttunda sæti með 14 stig, aðeins fjórum stigum fyrir ofan fallsvæðið.