„Ég er mjög ánægður með frammistöðu liðsins, vorum mjög öflugir og þá sérstaklega í fyrri hálfleik. Við tókum yfir leikinn algjörlega og kláruðum hann í fyrri hálfleik," segir Jóhann Birnir Guðmundsson, þjálfari ÍR, eftir 0-3 útisigur á Fjölni í Lengjudeildinni í kvöld.
Lestu um leikinn: Fjölnir 0 - 3 ÍR
„Þannig séð gerist ekki mikið í seinni hálfleik sem hentaði okkur ágætlega, við vorum bara með algjöra stjórn á leiknum fannst mér og fannst þeir aldrei líklegir til að gera eitthvað."
„Mér er nákvæmlega sama hvað þér finnst um það," sagði Jói og hló, eftir að fréttamaður sagði við hann að seinni hálfleikurinn hefði verið sá leiðinlegasti sem hann hefði séð.
„Við hefðum átt að skora fleiri mörk úr opnum leik í dag, það gleður mann alltaf að skora, hvernig sem mörkin koma."
ÍR hefur farið frábærlega af stað í mótinu, liðið er með ellefu stig eftir fimm fyrstu leikina.
„Í langan tíma höfum við verið með nokkuð gegnheila frammistöðu og skilað ágætis úrslitum. Þetta kemur ekkert sérlega á óvart, við erum með bara með flott lið."
Það voru miklar breytingar á ÍR hópnum í vetur og þá hélt Árni Freyr Guðnason, samstarfsmaður Jóa, í Árbæinn og tók við Fylki.
„Við missum mjög góða leikmenn í fyrra, erum búnir að gera þokkalega vel í að fá menn í staðinn og erum búnir að halda kjarnanum í liðinu. Auðvitað veit maður ekki fyrir fram hvað framtíðin ber í skauti sér, við erum bara ánægðir með þann stað sem við erum á, erum búnir að tengja fleiri menn inn í hópinn. Mér finnst við vera með fleiri möguleika í hópnum í dag, þó að við höfum verið með marga mjög góða leikmenn í fyrra," segir Jói.
Í lok viðtalsins var hann spurður út í hafsentaparið og má sjá svör hans við þeirri spurningu sem og öllum hinum í spilaranum efst.
Athugasemdir
