30.09.23 - 12:30
Aksentije Milisic
Sjáðu markið: Fíflaði sex leikmenn Napoli áður en hann skoraði
Mynd: EPA
Mynd: EPA
Napoli vann öruggan 4-1 sigur á Udinese í miðri viku í Serie A deildinni en markið sem gestirnir skoruðu hefur vakið verðskuldaða athygli.
Þegar meistararnir voru í 3-0 forystu á 80. mínútu fékk Serbinn Lazar Samardzic boltann á miðjum velli og setti í fluggírinn. Hinn 21 árs gamli Lazar fíflaði sex leikmenn Napoli áður en hann kom boltanum í netið.
Geggjað einstaklingsframtak hjá þessum efnilega leikmanni en Isaac Success gerði einnig vel í markinu en hann tók svokallaðann „einn tvo” við Lazar á leið hans í átt að marki. Þetta huggulega mark má sjá með því að smella hér.
Udinese er í brasi en liðið er einungis með þrjú stig eftir sex leiki og er í fallsæti. Ítalíumeistararnir í Napoli sitja í fimmta sætinu með ellefu stig.
