Æfingaleikur: Jafntefli í markaleik Blika og Valsmanna

Breiðablik og Valur skildu jöfn í fjörugum markaleik á Kópavogsvelli í kvöld. Allur ágóði af miðasölu á leikinn rann til Píeta samtakanna.

Leikurinn var mjög fjörugur og fengu bæði lið fullt af færum til að skora. Orri Sigurður Ómarsson kom Val yfir á tíundu mínútu en stuttu síðar jafnaði Daninn Thomas Mikkelsen fyrir Blika. Mikkelsen var aftur á ferðinni tíu mínútum síðar.

Í liði Vals er líka mjög öflugur danskur sóknarmaður. Patrick Pedersen jafnaði úr vítaspyrnu á 35. mínútu og var staðan jöfn í hálfleik. Hann kom Val svo yfir eftir 20 mínútur í síðari hálfleiknum.

Valsmenn virtust vera að landa sigrinum, en í uppbótartíma jafnaði varamaðurinn Kwame Quee og tók hann nokkur góð dansspor í kjölfarið.

Lokatölur 3-3 í þessum fjöruga leik á Kópavogsvelli. Pepsi Max-deildin hefst svo um miðjan næsta mánuð, en búast má við því að bæði þessi lið verði í toppbaráttu þar.