Hannes Þór Halldórsson (KR)
Hannes heldur áfram að standa sig í markinu hjá KR og nýtur þess einnig að vörnin er traust fyrir framan sig þrátt fyrir smá óöryggi í byrjun móts.

Guðjón Árni Antoníusson (FH)
Happafengur fyrir Hafnarfjarðarliðið. Skilar sínu varnarlega og tekur einnig virkan þátt í sóknarleiknum. Hefur skorað fjögur mörk í deildinni.

Ármann Smári Björnsson (ÍA)
Sérstaklega öflugur fyrri hlutann. Étur allt í loftinu og er auk þess gríðarlega ógnandi í föstum leikatriðum.

Alexander Scholz (Stjarnan)
Hágæða danskur leikmaður sem hefði vel getað verið valinn leikmaður fyrri helmingsins ef Atli Guðnason hefði ekki verið svona frábær. Náttúrubarn sem er illviðráðanlegur í varnarhlutverki Stjörnunnar.

Kristinn Jónsson (Breiðablik)
Þrátt fyrir að Blikaliðið hafi sýnt óstöðugleika hefur Kristinn verið stöðugur og klárlega þeirra besti maður. Átti við meiðsli að stríða í vetur en það sést alls ekki á leik hans.

Björn Daníel Sverrisson (FH)
Eftir að hafa mikið verið notaður sem vinstri bakvörður síðasta vetur hefur Björn sýnt það að hann á heima á miðjunni. Enginn hefur skorað meira en hann í deildinni.

Rúnar Már Sigurjónsson (Valur)
Meðan aðrir miðjumenn Vals hafa leikið undir væntingum hefur Rúnar drifið sitt lið áfram. Gríðarlega drjúgur og að mörgu leyti mjög vanmetinn leikmaður.

Arnór Ingvi Traustason (Keflavík)
Yngsti leikmaður úrvalsliðsins. Hefur verið stórskemmtilegur í liði Keflavíkur og hefur tekið miklum og hröðum framförum.

Óskar Örn Hauksson (KR)
Einn allra allra skemmtilegasti fótboltamaður deildarinnar. Hans helsti ókostur var óstöðugleiki en sá þáttur hefur bæst gríðarlega. Áhorfendur líta ekki frá vellinum þegar Óskar er með boltann.

Atli Guðnason (FH)
Eftir að hafa verið valinn bestur 2009 gekk Atla erfiðlega að ná sömu hæðum. Hann hefur hinsvegar verið á eldi í sumar, skorað og lagt upp eins og enginn sé morgundagurinn. Sannur liðsmaður sem gerir leikmenn í kringum sig betri.

Christian Olsen (ÍBV)
Byrjaði tímabilið ekki vel en þegar Eyjaliðið fór að ná sér á strik og hann fór að fá aukna þjónustu byrjuðu hæfileikar hans að koma í ljós. Hefur leikið lykilhlutverk í uppgangi Eyjaliðsins á töflunni.

Varamannabekkur:
Ómar Jóhannsson (Keflavík)
Sverrir Ingi Ingason (Breiðablik)
Freyr Bjarnason (FH)
Jóhann Laxdal (Stjarnan)
Jóhann Birnir Guðmundsson (Keflavík)
Jón Daði Böðvarsson (Selfoss)
Kennie Chopart (Stjarnan)