Í dag er stór dagur í sögu knattspyrnudeildar Aftureldingar þar sem formleg vígsla á nýju og glæsilegu knatthúsi að Varmá hefst klukkan 13:00.
Knatthúsið er um 3.200 fermetrar að stærð og rúmar hálfan knattspyrnuvöll. Húsið mun gjörbylta allri aðstöðu til knattspyrnuiðkunar að Varmá. Í húsinu verða einnig hlaupabrautir sem munu nýtast frjálsíþróttadeild félagsins.
Dagskrá er frá 13:00 til 15:00 og boðið verður upp á knattspyrnu- og frjálsíþróttaþrautir, vítakeppni, hoppukastala og léttar veitingar. Meðal þeirra sem taka til máls á viðburðinum eru Haraldur Sverrisson, bæjarstjóri Mosfellsbæjar, Birna Kristín Jónsdóttir, formaður Aftureldingar, og Guðni Bergsson, formaður KSÍ.
Afturelding mun nýta tækifærið og undirrita endurnýjun á samningum við þjálfara meistaraflokks kvenna. Þá verða kynntir til leiks nýir þjálfarar meistaraflokks karla.
Athugasemdir
