Bandaríkin: Stoðsending frá Gumma Tóta þegar Arnór Ingvi og félagar voru slegnir út

Það var dramatískur Íslendingaslagur í undanúrslitum Austurdeildar bandarísku MLS-deildarinnar þar sem Guðmundur Þórarinsson og félagar í New York City unnu Arnór Ingva Traustason og félaga í New England Revolution.

Íslendingarnir byrjuðu báðir á bekknum og staðan var 1-1 eftir 90 mínútna leik og því framlengt á Gillette leikvangnum, heimavelli New England.

Arnór kom inn í upphafi framlengingarinnar en Guðmundur á 101. mínútu og var búinn að vera inni á vellinum í einhverjar sekúndur þegar hann átti stoðsendingu á Argentínumanninn Valentín Castellanos sem kom New York yfir með skalla.

Heimamenn jöfnuðu í 2-2 á 118. mínútu og leikurinn fór í vítaspyrnukeppni þar sem New York fagnaði sigri og tryggði sér sæti í úrslitaleik Austurdeildarinnar. Íslendingarnir fóru ekki á punktinn í vítaspyrnukeppninni en Arnór var farinn aftur af velli þegar hún fór fram.