Orri Hrafn Kjartansson, leikmaður Fylkis, er að ganga í raðir Vals en þetta kemur fram í hlaðvarpsþættinum Dr. Football í kvöld. Þar er haldið fram að þetta séu líklega stærstu félagaskipti innanlands.
Orri, sem er 19 ára gamall, spilaði 20 leiki með Fylkismönnum í Pepsi Max-deildinni á nýafstöðnu tímabili og skoraði fjögur mörk.
Valur hefur verið á eftir Orra í einhvern tíma og lagt fram fjölmörg tilboð í kappann en síðasta tilboð sem Fylkir hafnaði hljóðaði upp á 5 milljónir.
Fylkir er nú búið að samþykkja nýtt tilboð frá Val sem er talið vera yfir sex milljónir og yrði þetta ein stærstu félagaskipti sem hafa verið gerð innanlands.
Albert segir að Orri verði að öllum líkindum kynntur hjá Val á morgun.
„Valur er búinn að eltast við hann lengi og bjóða nokkrum sinnum í hann og Fylkir hefur hafnað þeim boðum hægri vinstri. Nú loksins komu þeir með eitthvað alvöru boð og eins og þú segir skilst mér að það sé hæsta boð hérna innalands og þetta verður kynnt á morgun," sagði Albert Brynjar í Dr. Football.
Sjá einnig:
Mikill áhugi á Orra Hrafni - „Kemur bara allt í ljós" (11. okt)
Athugasemdir