15 umferðum er lokið í Lengjudeildinni og óhætt að segja að línur séu skýrar. Ekkert virðist geta komið í veg fyrir að HK og Fylkir leiki í Bestu deildinni á næsta tímabili.

HK fór í Mosfellsbæinn á föstudag og vann 1-0 útisigur gegn Aftureldingu. Stefán Ingi Sigurðarson skoraði eina mark leiksins. Tveir aðrir HK-ingar eru í liði umferðarinnar; markvörðurinn Arnar Freyr Ólafsson og fyrirliðinn Leifur Andri Leifsson.

Rúnar Páll Sigmundsson í Fylki er þjálfari umferðarinnar en Árbæingar unnu 5-2 sigur gegn Grindavík. Emil Ásmundsson skoraði tvö mörk í leiknum (eitt töframark) og hinn nítján ára gamli Óskar Borgþórsson kom af bekknum og átti tvær stoðsendingar.