Lyngby í viðræðum um kaup á Andra Lucasi

Niclas Kjeldsen yfirmaður íþróttamála hjá Lyngby var til viðtals hjá Bold.dk þar sem hann ræddi möguleikann á að festa kaup á Andra.

„Við viljum klára þetta en það er ekki bara hægt að ýta á einn takka. Það þarf að standast kröfur í samningnum og fara eftir lögum en ég ætla ekki að láta þér leiðast og útskýra það, við viljum ná samkomulagi við Norrköping og Andra," sagði Kjeldsen.

Hann segir m.a. að tíðar landsliðsferðir hjá Andra hafi tafið fyrir ferlinu en íslenski landsliðsmaðurinn hefur farið í þrjú landsliðsverkefni að undanförnu.

Þessi 21 árs gamli framherji hefur spilað 16 leiki fyrir Lyngby og skorað átta mörk. Lyngby er í 7. sæti í efstu deild í Danmörku með 20 stig eftir 17 leiki.