Hákon Rafn Valdimarsson, leikmaður Elfsborg og íslenska landsliðsins, er orðaður við Gent í Belgíu en hann hefur einnig verið orðaður við Anderlecht að undanförnu.
Hákon var valinn markvörður ársins í Svíþjóð og þriðji besti leikmaður deildarinnar þegar Elfsborg hafnaði í öðru sætinu.
Í kjölfarið fékk Hákon tækifæri í markinu hjá íslenska landsliðinu þar sem hann stóð sig með prýði í 2-0 tapi gegn Portúgal í undankeppni EM.
Hann er orðaður við Gent en liðið mætti Breiðablik í Sambandsdeildinni á dögunum þar sem Gent vann 2-3 sigur á Laugardalsvellinum. Gent vann þá fyrri leikinn með fimm mörkum gegn engu.
Það verður áhugavert að sjá hvað gerist í málum hins 22 ára gamla Hákons en belgískir fjölmiðlar segja að Gent hafi lagt fram tilboð í markmanninn. Formaður Elfsborg neitar þeim fréttum hins vegar.
„Það er mikill áhugi á Hákoni frá liðum erlendis. Það þurfa allir aðilar að vera sáttir svo niðurstaða náist. Við tölum mikið við Hákon og við sjáum hvað gerist," sagði Stefan Andreasson.