Spánn: Atlético vann - Frestuðu leik vegna andláts áhorfanda

Álvaro Morata og Ángel Correa skoruðu mörk heimamanna eftir stoðsendingar frá Antoine Griezmann og Marcos Llorente og leiddi Atletico 2-0 í leikhlé.

Almeria var talsvert sterkari aðilinn í síðari hálfleik og náði að minnka muninn á 62. mínútu með marki frá Léo Baptistao.

Gestunum tókst ekki að jafna þrátt fyrir yfirburði og urðu lokatölur 2-1 fyrir Atletico, sem er í þriðja sæti spænsku deildarinnar með 34 stig eftir 15 umferðir. Lærisveinar Diego Simeone eru fimm stigum eftir toppliði Real Madrid og eiga leik til góða.

Viðureign Granada og Athletic Bilbao var þá frestað eftir að áhorfandi lést á leiknum. Inaki Williams kom Athletic yfir snemma leiks en leikurinn var stöðvaður á 18. mínútu. Um hálftíma síðar var tekin ákvörðun um að fresta þyrfti leiknum vegna áfallsins.

Atletico Madrid 2 - 1 Almeria
1-0 Alvaro Morata ('17)
2-0 Angel Correa ('22)
2-1 Leo Baptistao ('62)

Granada 0 - 1 Athletic Bilbao
0-1 Inaki Williams ('6)
Leik frestað