8-liða úrslit Sambandsdeildarinnar hefjast í dag þegar Fiorentina heimsækir Viktoria Plzen á sama tíma og Olympiakos tekur á móti Fenerbahce.
Þar er um áhugaverða slagi að ræða, þar sem búist er við að Fiorentina komist framhjá Plzen í Tékklandi á meðan stjörnum prýtt lið Fenerbahce gæti lent í vandræðum gegn Vicente Iborra, Gelson Martins, Daniel Podence og félögum í Grikklandi.
Leikmannahópur Fenerbahce er gríðarlega öflugur og er liðið á blússandi siglingu í titilbaráttu tyrknesku deildarinnar.
Stórleikur dagsins hefst klukkan 19:00 þegar Aston Villa, sem er talið eitt af sigurstranglegri liðum keppninnar, tekur á móti Hákoni Arnari Haraldssyni og félögum frá Lille.
Hákon Arnar er með byrjunarliðssæti hjá Lille en þrautin gæti orðið ansi þung gegn Villa.
Hákon hefur verið að spila úti á vinstri kanti og ef hann verður í byrjunarliðinu í kvöld mun hann ekki mæta hægra bakverðinum öfluga Matty Cash vegna meiðsla. Hann mun líklegast mæta Ezri Konsa í staðinn, en Konsa er talsvert varnarsinnaðari leikmaður heldur en Cash, enda miðvörður að upplagi.
Að lokum er það viðureign Club Brugge og PAOK í Belgíu, þar sem PAOK er annað gríska félagið til að komast í 8-liða úrslitin.
Leikir kvöldsins:
16:45 Plzen - Fiorentina
16:45 Olympiakos - Fenerbahce
19:00 Aston Villa - Lille
19:00 Club Brugge - PAOK
Athugasemdir
