Viðar Örn Kjartansson.
„Ég var tíu tíma frá Kína til Frankfurt og þar var fluginu til Íslands frestað. Þaðan fórum við til Parísar og í morgunflug svo þetta voru fimmtán eða sextán tímar," segir Viðar Örn Kjartansson um ferðalag sitt frá Kína til Íslands.
Viðar og Sölvi Geir Ottesen leika með Jiangsu Sainty í Kína en þeir eru í íslenska landsliðshópnum sem mætir Tékkum á morgun. Viðar segist vera í góðu standi fyrir leikinn á morgun.
„Ég er í mjög góðu standi. Tímabilið er búið að vera mjög fínt hjá mér so far. Auðvitað vill maður skora í hverjum einasta leik en það er ekki búið að ganga. Ég er samt sáttur við tímabilið og er klár í slaginn."
Viðar segir fyrstu mánuðina í Kína hafa verið fína. „Ég bý í frekar flottu hverfi en ef þú keyrir aðeins lengra þá er hverfi sem er óhreinna. Maturinn og léleg ensku kunnátta kemur manni líka á óvart."
„Ég er með túlk sem hjálpar mér ef ég er í vandræðum. Ef þú ferð í taxa þá verður þú að vera með addressu á blaði á kínversku. Sumir skilja ekki orð í ensku og það kemur manni á óvart," segir Viðar en hann ætlar ekki að læra kínversku.
„Ég væri svona þrjú ár að því ef ég myndi hella mér í það núna. Eitt orð er kannski með fimm eða sex merkingar svo við getum gleymt þessu í bili."
Hér að ofan má sjá viðtalið í heild sinni.
