Ingólfur Þórarinsson þjálfari Hamars í 3.deildinni gat loksins fagnað fyrsta sigri í deildinni í níunda leik liðsins. Hamar unnu öruggan 6-2 sigur á ÍH á útivelli en ÍH er í 2.sæti deildarinnar.
,,Þetta er mjög gaman. Það er búið að vera þungt í mönnum. Við höfum oft verið nálægt því að vinna leiki en aldrei náð því og þetta er því mikill léttir og hjálpar mikið í klefanum," segir Ingólfur sem var settur á bekkinn fyrir leikinn en kom inná sem varamaður seint í leiknum.
,,Við gerðum ákveðnar breytingar og Víðir kemur inn sem manager og hann er mjög klár og gerir margar sniðugar breytingar sem hristir upp í hópnum og stundum er það sem þarf. Víðir er toppmaður," segir Ingó en Víðir gerði athyglisverða breytingu með því að setja útileikmann í markið og var með tvö markverði á bekknum.
,,Kjartan sem var settur í markið er nú nokkuð góður í markinu og hann hefur verið í marki á nokkrum æfingum. Það hefur vantað sjálfstraustið í markmennina hjá okkur. Það hefur lekið mikið inn og þeir hafa verið óheppnir. Víðir prófaði að setja útileikmann í markið og Kjartan stóð sig mjög vel og var nokkuð öruggur í því sem hann var að gera. Það er spurning hvort hann vilji fara byrja æfa mark 23 ára."
Það voru athyglisverð tíðindi í vikunni þegar Víðir Leifsson fyrrum knattspyrnuleikmaður var ráðinn knattspyrnustjóri 3.deildarliðs Hamars. Hann stillti því upp liðinu í kvöld og stjórnaði því af hliðarlínunni með svona líka góðum árangri.
,,Ég tók við þessu sem þjálfari, leikmaður, manager, stilla upp liðinu og keyra á æfingar, ég er hreinlega í öllu. Ég hugsaði með mér hvað þyrfti núna til að hrista upp í liðinu og mér fannst vanta einhvern sem kæmi og stillti upp liðinu og er grjótharður og þá datt mér í hug Víðir, sem er grjótharður," sagði Ingó í samtali við Fótbolta.net.
Viðtalið er hægt að sjá í heild sinni í sjónvarpinu hér að ofan.
