Rúnar Alex Rúnarsson mun standa vaktina í marki Dijon næstu mánuðina eftir að Alfred Gomis meiddist um helgina.
Gomis kom til Dijon frá SPAL í byrjun tímabils og tók stöðuna af Rúnari Alex.
Gomis meiddist í 3-3 jafnteflinu gegn Nantes um helgina en Rúnar Alex kom inn á fyrir hann í hálfleik í stöðunni 2-2. Dijon hefur staðfest að Gomis verði frá keppni næstu tvo til þrjá mánuðina en tímabilinu í Frakklandi lýkur 23. maí.
Dijon er í 17. sæti í Frakklandi, stigi á undan Nimes sem er í 18. sæti en það sæti þýðir umspil um fall. Fimm stig eru frá Dijon niður í Amiens í 19. sæti.
Dijon mætir PSG í franska bikarnum í kvöld en síðan taka við deildarleikir gegn Bordeaux, Mónakó og PSG.
Athugasemdir