Á lokadegi félagaskiptagluggans fékk Afturelding Ými Halldórsson á láni frá Breiðabliki. Ýmir kannast ágætlega við sig hjá Aftureldingu því hann var á láni hjá félaginu seinni hluta síðasta tímabils.
Ýmir kom við sögu í sex leikjum með Aftureldingu en fyrri hluta mótsins hafði hann leikið með Augnabliki.
Hann á að baki einn keppnisleik með meistaraflokki Breiðabliks en hann kom inn á sem varamaður í 3-0 sigri liðsins gegn Gróttu í Mjólkurbikarnum sumarið 2020. Í gær var hann á varamannabekknum þegar Breiðablik lék gegn Stjörnunni í Bestu deildinni.
Hann er varnarmaður sem gæti spilað í 2. umferð Lengjudeildarinnar þegar Afturelding fær Vestra í heimsókn annað kvöld.
„Afturelding býður Ými hjartanlega velkomna í Mosfellsbæinn en félagið vill einnig þakka Breiðabliki fyrir góð samskipti varðandi lánssamninginn," segir í tilkynningu Aftureldingar.
Athugasemdir