Landsliðsmaðurinn Emil Hallfreðsson útilokar ekki að hann muni spila með FH í Pepsi Max-deildinni í sumar. Hinn 35 ára gamli Emil æfir með FH þessa dagana á meðan hlé er í fótboltanum á Ítalíu þar sem hann er á mála hjá Padova í Serie C.
Emil er viðmælandi í nýjasta þætti Steve Dagskrá og þar er hann spurður að því hvort hann gæti spilað með FH í sumar.
„Ég veit það ekki nákvæmlega. Ég er með samning til 30. júní. Ég ætla ekki að segja já eða nei. Það verður að leyfa tímanum að leiða þetta í ljós," sagði Emil í viðtali við Steve Dagskrá.
„Ég ætla að sjá fyrst hvað gerist með deildina mína. Það er verið að tala um að fara beint í umspil og ef það er möguleiki þá verður það skemmtilegast í stöðunni. Þetta kemur bara í ljós. FH er samt alltaf minn klúbbur. Það er alveg á hreinu."
Padova er í 6. sæti í sínum riðli í Serie C en það gefur sæti í umspili. Ekki hefur verið ákveðið hvenær og hvort deildarkeppnin fari aftur af stað í Serie C en hlé var gert í mars vegna kórónaveirunnar.
Athugasemdir