Óskar Hrafn Þorvaldsson þjálfari KR var svekktur með að detta út úr bikarnum eftir að liðið hans tapaði 4-2 fyrir ÍBV í kvöld.
Lestu um leikinn: KR 2 - 4 ÍBV
„Það er auðvitað svekkjandi að tapa bikarleik, en það er bara eins og það er. Við réðum ekki við Omar Sowe í dag og ef þú ræður ekki við hann, þá getur þú lent í vandræðum sem að við gerðum. Það var okkar banabiti í dag að geta ekki haft stjórn á honum. Hann var frábær og bara til hamingju Eyjamenn," sagði Óskar.
Óskar var með Omar Sowe í liði sínu þegar hann þjálfaði Breiðablik og þekkir því vel inn á leikmanninn.
„Omar er fljótur, líkamlega sterkur og hann er góður að hlaupa á bakvið. Hann er bara öflugur alhliða framherji, sem hefur kannski stundum skort stöðugleika. Við vissum það alveg, og ef menn sáu það ekki í dag, þá sáu þeir það á laugardaginn, að það þarf að hafa sig allan við til að hafa stjórn á honum. Við gerðum það svo sem ágætlega á laugardaginn en í dag réðum við ekkert við hann. Þetta er feykilega góður lærdómur fyrir hafsentana okkar, þegar þú ert maður á mann þá verður þú að gjöra svo vel að klára manninn þinn. Ef þú nærð ekki að klára manninn þinn, þá erum við í basli," sagði Óskar.
„Eina leiðin til að læra, er að spila svona, við erum að spila svona áfram. Það má kannski segja það að við erum bara í mótun, við erum að þroskast sem lið. Þessi leikur svolítið eins og að læra að hjóla og ferð upp á hjólið. Í dag duttum við af hjólinu og þá er bara ein leið til að halda áfram að læra að hjóla, og það er að stíga á hjólið aftur, og ekki vera að hræddur við að detta. Við verðum fjótir að þurrka þennan leik úr óhreina lakinu okkar."
Viðtalið má sjá í heild sinni í spilaranum hér fyrir ofan.
