Emma Hayes, þjálfari kvennaliðs Chelsea á Englandi, var ánægð með innkomu Maríu Þórisdóttur í 2-1 sigrinum á Arsenal í úrvalsdeildinni í gær.
María, sem er mikilvæg í norska landsliðinu, byrjaði á bekknum ásamt Ramonu Bachmann en þeim var skipt inná á 74. mínútu og bjuggu til sigurmarkið sem kom undir lokin.
Bachmann kom knettinum á Maríu sem skoraði af 20 metra færi en Hayes var í skýjunum með Maríu.
„Ef maður hefur rétt fyrir sér í þessum skiptunum þá er maður magnaður en ef þetta fer á versta veg þá er maður fullur af skít," sagði Hayes.
„Ég hafði rétt fyrir mér í dag. Ég er með Magdalenu Eriksson og Millie Bright í vörninni. Hversu óheppin er María? Hún er magnaður leikmaður og það eru magnaðir leikmenn sem halda henni á bekknum."
„Hún verður að aðlagast leikstílnum til að komast í liðið. Markið hennar var ekkert óvenjulegt og ef þú værir á æfingasvæðinu hjá okkur þá gerir hún þetta reglulega. Hún er sigurvegari eins og Ramona og þær eru mjög óheppnar að vera ekki í liðinu því ég get bara valið ellefu leikmenn," sagði hún í lokin.
Athugasemdir