„Mörk breyta leikjum. Við að komast í stöðuna 1-1 hefði verið allt annað heldur en að fá strax í næstu sókn 2-0 mark í andlitið,“ sagði Aníta Lísa Svansdóttir, þjálfari Fram, eftir 3-0 tap gegn Fylki í sjöundu umferð Lengjudeild kvenna í kvöld.
Lestu um leikinn: Fylkir 3 - 0 Fram
Elaina Carmen La Macchia, markvörður Fram, fór meidd út af velli í fyrri hálfleik eftir samstuð við Guðrúni Karítas Sigurðardóttur, framherja Fylkis.
„Hún lendir í samstuði og fær risastóran skurð á hnéð. Alveg góður 20 sentimetra skurður, frekar djúpur. Þannig það var bara beint upp á slysó að sauma.“
Eftir að Elaina fór út af komst Fram vel inn í leikinn og átti skot í stöngina og slánna í sömu sókn. Stuttu seinna fengu þær þó á sig annað markið í leiknum.
„Það er alltaf svekkjandi þegar þú ert svona ofarlega á vellinum og ert svona nálægt því að jafna leikinn.“
Fram vann sinn fyrsta leik á tímabilinu í síðustu umferð á dramatískan hátt eftir mark í uppbótartíma.
„Nauðsynlegt að ná í fyrsta sigurinn og hvað þá á heimavelli. Við viljum alltaf í dal draumanna vinna leiki.“
Viðtalið má sjá í heild sinni hér að ofan.
