„Ég hefði aldrei tekið stigið fyrirfram, við ætluðum að vinna þennan leik," sagði Davíð Smári Lamude þjálfari Vestra eftir 2 - 2 jafntefli við Aftureldingu í Lengjudeild karla í kvöld.
Lestu um leikinn: Vestri 2 - 2 Afturelding
Vestri var 2 - 0 yfir í hálfleik gegn toppliðinu og spiluðu frábærlega en virtist sem allt annað lið kæmi út í seinni hálfleikinn. Hvað gerðist?
„Það var þreyta og við féllum aðeins til baka, en það voru alls ekki skilaboðin. Við ætluðum að klára leikinn. Það er stutt síðan við spiluðum og menn falla sjálfkrafa aðeins neðar á völlinn. Þeir ógnuðu markin okkar ekki neitt í fyrri hálfleik og menn héldu mögulega að þetta yrði of auðvelt í seinni hálfleik, ég veit það ekki. Þeir komast utan á okkur margoft trekk í trekk og ná að koma honum inn í boxið. Þeir fylla boxið vel," sagði hann og sneri sér svo næst að dómaranum, Guðmundi Páli Friðbertssyni.
„Stóra málið í þessu er að það er ekki hægt að vinna fótboltaleik þegar dómgæslan er svona, hún hallar svona á eitt lið. Það er ofboðslega erfitt að vinna fótboltaleik þannig og ég held að það hafi flestir séð að maðurinn á flautunni átti því miður afleitan dag. Mann langar ekki að vera að væla yfir þessu en þetta er svo ofboðslega svekkjandi þegar liðið er búið að leggja svonan mikið inn, erfiður leikur og þetta sé svona. Bæði lið eru hundfúl. Leikmaðurinn hjá þeim átti klárlega að fá rautt spjald. Ég man ekki eftir að hafa séð annað eins brot þar sem hann fær gult spjald. Sólinn er í hné hæð og heppnir að hann var ekki fótbrotinn í dag. Línuvörðurinn er 15 metrum frá þessu, dómarinn er 8 metrum frá þessu. Bein í gult spjald, ég bara skil þetta ekki."
Nánar er rætt við Davíð Smára í spilaranum að ofan.
