Lestu um leikinn: Ísland 4 -  0 Liechtenstein

„Virkilega ljúft, búin að vera erfið meiðsl. Erfiður tími, bæði í fjölskyldunni og hjá sjálfum mér. Það er virkilega jákvætt að vera kominn af stað aftur og fá mínútur í kroppinn. Vonandi get ég byggt ofan á það."

Getur ekki gefið eins af sér uppi í stúku
Tólfan söng 'inn á með Aron' og fleiri tóku undir á Laugardalsvelli í kvöld.

„Ég á svo góðar minningar hérna á Laugardalsvelli, gerir þetta bara ennþá sætara. Góð tilfinning að vera kominn inn á aftur og spila fótbolta aftur. Það er það sem ég geri best og vil gefa af mér. Ég geri það ekki uppi í stúku."

„Mér líður mjög vel í skrokknum, átti góða æfingaviku og ég held þetta sé það mesta sem ég hef æft í langan tíma í landsliðsverkefni. Það er jákvætt. Ég vil byggja ofan á það, vera í góðu formi í nóvember og koma mér svo í annað lið í janúar. Þá er boltinn farinn að rúlla almennilega."

Á góðar minningar á Laugardalsvelli og með Gylfa
Aron tók við fyrirliðabandinu þegar hann kom inn á. „Ég á svo góðar minningar hérna, þetta bætir bara ofan á það. Það er langt síðan ég spilaði á Laugardalsvelli, var að berjast við það í sumar og ætlaði mér svo að koma sterkur til baka. Þetta var sæt tilfinning, ég get alveg sagt það."

Gylfi Þór Sigurðsson er eftir leikinn í kvöld orðinn markahæsti leikmaður í sögu landsliðsins, tók fram úr Eiði Smára og Kolbeini Sigþórssyni í dag. Aron og Gylfi hafa spilað merkilegustu leiki í sögu landsliðsins saman. Hvernig var að sjá Gylfa slá metið?

„Við eigum margar góðar minningar saman inn á vellinum, þetta var bara ein í viðbót. Þó að ég hafi ekki spilað með honum þá var gaman að vera til staðar þegar hann er kominn til baka og líka vice versa. Hann gefur mikið inn í hópinn, gefur mikið fyrir mig, gefur mikið fyrir þessa ungu stráka og við líka fyrir hann. Þetta er bara jákvætt."

Aron nefndi erfiða tíma í upphafi viðtals. Systir hans lést langt fyrir aldur fram í haust.

„Ég er búinn að ganga í gegnum erfiða tíma og dimman dal, en á gott fólk í kringum mig sem hefur hjálpað mér virkilega mikið. Það er gott að eiga stóra og góða fjölskyldu, góða konu og börn. Ég tel mig ríkan með það," sagði Aron.

Hann segir að í janúar muni hann finna sér nýtt félag þar sem hann er ekki skráður hjá Al Arabi sem einn af fimm erlendu leikmönnum félagsins. Hann mun fara á láni innan Katar.