Miðvörðurinn Sverrir Ingi Ingason hættir ekki að skora um þessar mundir.
Landsliðsmiðvörðurinn var á skotskónum fyrir PAOK þegar liðið komst áfram í gríska bikarnum í dag.
PAOK burstaði AEL Larissa, sem er einnig úrvalsdeildarlið, á útivelli í bikarnum, 5-0. Sverrir Ingi skoraði fjórða markið af fimm en hann hefur núna skorað fjögur mörk í sex leikjum sem hann hefur spilað, þar af í þremur leikjum í röð. Það er nú alls ekki mjög algengt hjá miðverði að skora svona mikið.
PAOK, sem er eitt stærsta félag Grikklands, er komið áfram í 8-liða úrslit bikarsins.
Núna er í gangi leikur Olympiakos við Panetolikos. Þar er Ögmundur Kristinsson að spila sinn fyrsta leik fyrir stórlið Olympiakos. Við færum ykkur fréttir af þeim leik þegar honum lýkur.
