Það var einn leikur í deild þeirra bestu á Spáni í kvöld, og var hann svo sannarlega skemmtilegur.

Getafe tók á móti Granada, og voru það heimamenn sem tóku forystuna eftir tíu mínútna leik. Sandro Ramirez, sem gerði það nú ekki gott með Everton á sínum tíma, skoraði og kom Getafe yfir. Forystan lifði hins vegar ekki lengi því Kólumbíumaðurinn Luis Suarez jafnaði fyrir Granada þremur mínútum síðar.

Fleiri voru mörkin ekki í fyrri hálfleik, en strax eftir tvær mínútur í seinni hálfleik komst Getafe aftur yfir þegar Enes Unal skoraði. Miðjumaðurinn Nemanja Maksimovic skoraði þriðja mark Getafe eftir rúmlega klukkutíma leik.

Granada gafst ekki upp og minnkaði Luis Suarez muninn með sínu öðru marki. Getafe náði hins vegar að loka leiknum þegar varamaðurinn Borja Mayoral skoraði á 87. mínútu.

Getafe átti alltaf svör og þeir náðu í þrjú stig úr þessum skemmtilega leik. Granada er í 14. sæti með 24 stig og Getafe er í 16. sæti með 21 stig. Getafe er núna fjórum stigum frá fallsvæði.