West Ham United vann annan deildarleik sinn í röð er það bar sigurorð af nýliðum Sunderland, 3-1, í 23. umferð deildarinnar í Lundúnum í dag.

Hamrarnir hafa litið vel út í síðustu leikjum og var þetta þriðji sigurinn í röð í öllum keppnum.

Hollendingurinn Crysenscio Summerville skoraði frábært skallamark á 14. mínútu eftir fyrirgjöf Jarrod Bowen, sem fékk nægan tíma hægra megin til að koma boltanum fyrir markið.

Bowen var sjálfur á skotskónum tæpum stundarfjórðungi síðar er Trai Hume braut á Ollie Scarles í teignum. Bowen var öruggur á punktinum og West Ham í tveggja marka forystu.

Á 43. mínútu, markamínútunni sjálfri, fór Mateus Fernandes langt með að gera út um leikinn með draumamarki er hann þrumaði boltanum fyrir utan teig og í samskeytin vinstra megin.

Stórkostlegur fyrri hálfleik hjá heimamönnum en í þeim síðari fóru Sunderland-menn aðeins að ógna.

Hollenski sóknarmaðurinn Brian Brobbey minnkaði muninn með skalla á 66. mínútu eftir fyrirgjöf Nordi Mukiele og svo var Luke O'Nien ótrúlega nálægt því að skora eitt flottasta mark tímabilsins er misheppnuð fyrirgjöf hans breyttist í frábært skot.

Boltinn var á leið í samskeytin nær en Alphonse Areola rétt náði að koma Hömrunum til bjargar.

Í uppbótartíma komu West Ham menn boltanum í netið eftir mjög sérstaka atburðarás. Fernandes átti hörkuskot í þverslá á meðan Kostas Mavropanos og Omar Alderete voru að rífast og höfðu ekki hugmynd um það sem átti sér stað. Í kjölfarið var boltanum skallað í átt að marki þar sem Tomas Soucek ýtti við Robin Roefs sem blakaði boltanum í bakið á Soucek og þaðan fór boltinn inn fyrir línuna.

Í fyrstu dæmdi dómarinn mark en var fljótur að leiðrétta það og urðu því lokatölur 3-1 West Ham í vil. West Ham er í 18. sæti með 20 stig, tveimur stigum frá öruggu sæti en Sunderland í 9. sæti með 33 stig.