Wolves tekur á móti Bournemouth klukkan 18:45. Bæði lið eru örugg með sæti sitt í deildinni. Tæknilega séð eiga bæði möguleika á að komast í Sambandsdeild Evrópu, en það er sjöunda sætið sem mun gefa það þar sem Liverpool, sem vann deildabikarinn, er á leið í Meistaradeild.

Klukkan 19:00 mætir Manchester United liði Sheffield United á Old Trafford. United er svo gott sem búið að missa af Meistaradeildarsæti en það eru tvær leiðir fyrir liðið að komast í Evrópudeild. Annað hvort vinna bikarinn eða lenta í 5. eða 6. sæti deildarinnar. Það er tímaspursmál hvenær Sheffield United fellur niður um deild, en hvort liðið eigi eitthvað eftir á tankinum verður að koma í ljós.

Crystal Palace spilar við Newcastle United á sama tíma á meðan Everton tekur á móti Liverpool á Goodison Park. Liverpool er í öðru sæti deildarinnar með 74 stig, eins og topplið Arsenal, og ef liðið ætlar að vera með í titilbaráttunni er ekki í boði að tapa stigum.

Leikurinn er ekki síður mikilvægur fyrir Everton, sem er í 16. sæti, aðeins fimm stigum fyrir ofan fallsæti.

Leikir dagsins:
18:45 Wolves - Bournemouth
19:00 Man Utd - Sheffield Utd
19:00 Crystal Palace - Newcastle
19:00 Everton - Liverpool