Ætlar að halda áfram hjá Como þrátt fyrir mikinn áhuga

Fabrizio Romano greinir frá því að Fábregas hafi engan áhuga á að skipta um félag í sumar, hann vilji halda áfram með verkefnið sem er farið af stað hjá Como. Fábregas, sem er meðal eigenda félagsins, hefur staðið sig gríðarlega vel sem þjálfari liðsins.

Topplið úr ítalska boltanum hafa áhuga á Fábregas og þá reyndi RB Leipzig einnig að krækja í hann á dögunum, en án árangurs. Fábregas vill vera áfram í Como.

Hann er spenntur fyrir framtíð félagsins og hlakkar til félagaskiptagluggans í sumar. Þar mun Como til að mynda festa kaup á bakverðinum efnilega Álex Valle, sem hefur verið að gera flotta hluti fyrir liðið á láni frá Barcelona.

Valle, sem er 20 ára gamall, kostar ekki nema 6 milljónir evra. Hann varði fyrri hluta tímabilsins á láni hjá Celtic í Skotlandi og stóð sig vel þar, en hann er landsliðsmaður í sterku U21 liði Spánverja.

Hann á 20 leiki að baki fyrir yngri landsliðin og er lykilmaður fyrir framtíðaráform Fábregas.