Spánn: Llorente og Suarez afgreiddu Real Betis

Atletico Madrid tók á móti Real Betis í stórleik á Spáni. Gestirnir frá Sevilla stjórnuðu fyrri hálfleiknum algjörlega og voru óheppnir að koma knettinum ekki í netið.

Diego Simeone gerði tvær breytingar í hálfleik þar sem Hector Herrera tók stöðu Lucas Torreira á miðjunni á meðan Yannick Carrasco leysti Thomas Lemar af hólmi á vinstri kanti.

Tuttugu sekúndum síðar skoraði Marcos Llorente laglegt mark eftir frábært einstaklingsframtak og tóku heimamenn öll völd á vellinum.

Á 74. mínútu var Martin Montoya rekinn útaf með beint rautt spjald fyrir að brjóta af sér sem aftasti varnarmaður. Atletico tókst þó ekki að gera út um viðureignina fyrr en Luis Suarez skoraði eftir skyndisókn í uppbótartíma.

Atletico er í öðru sæti eftir sigurinn, með ellefu stig eftir fimm umferðir. Betis er búið að tapa fjórum af síðustu fimm leikjum sínum í deildinni.