Úlfarnir fagna.
Álafoss mætir Úlfunum í undanúrslitum.
Það var heldur betur dramatík í 5. deild karla í gærkvöldi þegar ljóst varð hvaða lið mætast í undanúrslitum deildarinnar. Spilað er um tvö laus sæti í 4. deild.
Úlfarnir smeygðu sér í undanúrslitin á markatölu með 0-8 sigri gegn Þorláki í gærkvöldi. Þeir þurftu að vinna stórt þar sem BF108 var með betri markatölu.
Úlfarnir þurftu að vinna upp fjögurra marka mun eftir að BF108 vann 2-3 sigur á RB í Nettóhöllinni. Úlfarnir voru 0-3 yfir í hálfleik gegn Þorláki en komu sterkir út í seinni hálfleikinn og unnu að lokum 0-8 sigur.
Kristo Beshiku hefur verið drjúgur fyrir Úlfana í sumar en hann skoraði fjögur mörk í leiknum í gær. Alls hefur hann gert ellefu mörk í sjö leikjum.
Úlfarnir enduðu tímabilið frábærlega en þeir voru í sjöunda sæti af átta liðum þegar mótið var hálfnað, aðeins með fimm stig. Þeir unnu alla leikina í seinni umferðinni og eru komnir í undanúrslitin eftir dramatík í gær.
KFR, Álafoss og Skallagrímur eru hin liðin í undanúrslitunum sem hefjast á laugardaginn næstkomandi. LIðin sem vinna undanúrslitaeinvígin fara upp í 4. deild.
Undanúrslitin:
Skallagrímur - KFR
Úlfarnir - Álafoss
Leikdagar:
30. ágúst, Skallagrímur - KFR
1. september, Úlfarnir - Álafoss
6. september, KFR - Skallagrímur
7. september, Álafoss - Úlfarnir
Spilað er um sigur í deildinni 11. september.
Athugasemdir
