Eiður gríðarlega efnilegur þjálfari
Logi og Eiður voru ráðnir í sumar þegar Ólafur Kristjánsson hélt erlendis og árangurinn hefur verið góður hjá Hafnarfjarðarliðinu. Logi segir að samstarfið milli síns og Eiðs sé þægilegt og gott.

„Það hefur alltaf farið vel á með okkur og getum starfað saman án þess að tala of mikið saman. Við horfum á hvorn annan og erum að hugsa það sama. Það hefur gengið rosalega vel. Úrslitin hafa svo fylgt okkur," segir Logi.

Upphaflega var Logi Ólafsson ráðinn sem aðalþjálfari en hann hefur gefið Eiði Smára mikið vægi og ávallt talað um þá tvo saman.

„Ég sagði það strax í upphafi að í samstarfi við mig myndi hann fá að njóta sín. Ég tók það skýrt fram að ég væri ekki að fara að kenna honum neitt, Eiður Smári Guðjohnsen kann þetta. Hann fær þarna tækifæri til að æfa sig, með stuðningi. Ég hef mínar hugmyndir og við ræðum þær. Ábyrgðin hefur verið algjörlega á okkur báðum," segir Logi en Eiður hefur verið meira áberandi í viðtölum kringum leiki.

„Ég er búinn að svara þessari spurningu 'Hver eru þín fyrstu viðbrögð?' í 36 ár. Mér finnst mjög eðlilegt að menn vilji frekar tala við hann og þess fyrir utan vil ég það sjálfur að hann tali. Eiður er gríðarlega efnilegur þjálfari, það er ekki nokkur vafi á því. Það er enginn með slíka sögu sem leikmaður og ég tel að Eiður eigi bjarta framtíð sem þjálfari."

Logi segir að einn helsti styrkleiki Eiðs sé samskiptahæfni við hópa.

„Hann var fyrirliði landsliðsins. Hvernig hann talar við fólk, talar á æfingum og tjáir sig í klefanum. Ég var aldrei í vafa um hann, hann hefur þetta. Spurningin er bara varðandi tækifærið sem hann fær," segir Logi.

Feginn að búið sé að eyða ákveðinni óvissu
FH er í öðru sæti Pepsi Max-deildarinnar, í Evrópusæti, og er einnig í undanúrslitum bikarsins. Stefnan er að klára deildina núna í komandi mánuði en vegna Covid-faraldursins er stopp á mótinu.

Logi segir að það sé gott að búið sé að taka ákvörðunina um að reyna að klára mótið en viðurkennir að hafa sjálfur verið á þeirri skoðun að best væri að slaufa mótinu.

„Ég var þeirrar skoðunar að það ætti að spila leik Stjörnunnar og KR, svo allir væru með átján leiki, og segja svo takk fyrir okkur. Þetta skiptir félögin gríðarlega miklu máli því það þarf að framlengja samninga við menn og þetta getur kostað fullt af peningum," segir Logi.

„Svo kemur ýmislegt annað inn í þetta eins og engir áhorfendur og engar tekjur. Á móti er verið að forðast einhver málaferli, þar sem þetta hefur vertið gert (mótinu hætt) í Evrópu logar allt í deilum og málaferlum."

„Ég er býsna feginn að búið sé að taka ákvörðun um að klára þetta og eyða ákveðinni óvissu. Það eru engu að síður óvissuþættir framundan, eins og til dæmis hvað gerist ef eitt lið verður sent í sóttkví," segir Logi en hægt er að hlusta á útvarpsþáttinn í spilaranum hér að neðan.