Fabrizio Romano greinir frá því að Bayer Leverkusen er búið að festa kaup á tékkneska kantmanninum Adam Hlozek. Hann á aðeins eftir að gangast undir læknisskoðun.
Hlozek, sem á tvítugsafmæli í júlí, kemur frá Sparta Prag í Tékklandi þar sem hann hefur leikið allan ferilinn.
Hlozek hefur gert 40 mörk í 131 leik með Sparta og var þar að auki lykilmaður í yngri landsliðum Tékka. Hann gerði 19 mörk í 33 keppnisleikjum með yngri liðum Tékklands og hefur skorað einu sinni í tólf leikjum með A-landsliðinu.
West Ham og Sevilla sýndu Hlozek áhuga en vildu fá hann á lánssamningi.
Leverkusen borgar 13 milljónir evra fyrir Hlozek og er 30% endursöluákvæði í kaupsamningnum.
Þá eru minnst þrjú félög í Þýskalandi sem hafa áhuga á Ko Itakura, japönskum miðverði Manchester City.
Itakura er 25 ára gamall en hefur ekki komið við sögu í leik með Man City síðan hann gekk í raðir félagsins 2019. Undanfarin tímabil hefur Itakura gert flotta hluti á láni hjá Gröningen í Hollandi og nú síðast með Schalke í B-deild þýska boltans.
Schalke er með 5,5 milljón evra kaupákvæði í lánssamningnum en er hikandi við að nýta það. City vill selja varnarmanninn sem á aðeins eitt ár eftir af samningi sínum við félagið.
Itakura á 8 landsleiki að baki fyrir A-landslið Japan og 24 fyrir U23 landsliðið.
