Enski miðvörðurinn Fikayo Tomori er í viðræðum við AC Milan um nýjan samning en þetta segir Fabrizio Romano á X í dag.
Tomori er 27 ára gamall uppalinn Chelsea-maður en hann gekk í raðir Milan árið 2021 þar sem hann hefur fundið sig vel í vörninni og er talinn með þeim allra bestu í deildinni.
Englendingurinn var orðaður við Juventus og Tottenham í sumar, en sagði sjálfur frá því í ágúst að hann væri ánægður hjá Milan.
Romano segir að Milan vilji alls ekki missa Englendinginn úr sínum röðum og hafi nú hafið viðræður við leikmanninn um framlengingu á samningnum.
Tomori, sem var í liði ársins í Seríu A þegar liðið vann deildina tímabilið 2021-2022, á 5 A-landsleiki með Englandi og var í U20 ára landsliðinu sem vann HM árið 2017.
Athugasemdir
