Lúkas Logi Heimisson gekk til liðs við Val frá Fjölni fyrir tímabilið en hann hefur ekki spilað margar mínútur í sumar.
Þessi tvítugi miðjumaður hefur komið við sögu í 23 leikjum í Bestu deildinni en aðeins þrisvar verið í byrjunarliðinu. Hann kom sterkur inn af bekknum þegar Valur sigraði Breiðablik í gær.
Hann fiskaði vítaspyrnu og lagði upp fjórða markið í 4-2 sigri. Arnar Grétarsson þjálfari Vals var spurður út í hann í viðtali hjá Mbl eftir leikinn.
„Það býr alveg rosalega mikið í þeim strák. Stundum er það þannig með unga leikmenn að við höfum kannski ekki séð alveg nægilega mikið af því á vellinum en hann er búinn að sýna okkur í allt sumar hvað hann getur á æfingum. Þá er það bara tímaspursmál hvenær það kemur, hann var frábær þegar hann kom inná á móti KR og aftur í kvöld. Mér finnst síðustu innkomur hjá honum hafa verið mjög flottar, það hefur verið kraftur í honum og hann er bara frábær í fótbolta. Ég er virkilega ánægður fyrir hans hönd og hann á örugglega eftir að gera meira af þessu á næstunni, framtíðin er hans," sagði Arnar.
Lúkas var mikið í fréttum í aðdraganda skiptanna til Vals en hann fór m.a. í verkfall til að þvinga Fjölni til að losna við sig. Eftir að hann gekk til liðs við Val sagði hann að það hafi verið eina úrræðið að fara í verkfall.
