Veit ekki hvort hann verði áfram
„Það er náttúrulega bara léttir að við spilum í Pepsi deildinni á næsta tímabili,“sagði Ian Jeffs, þjálfari ÍBV, eftir 1-1 jafntefli við FH í dag.
Lestu um leikinn: FH 1 - 1 ÍBV
„Ef við tökum bara leikinn í dag er ég drullu svekktur að taka ekki þrjú stig í dag. Mér fannst spilamennskan mjög góð og þeir þurftu bara hjálp í dag,“ sagði Jeffs og vísaði þar til vítaspyrnu sem FH fengu undir lok leiks. „Þetta fór klárlega í hendina á honum en hann var ekki að reyna að teygja sig í boltann. Hann stóð allan tímann með hendina við hliðina á líkamanum.“
Mikið hefur verið spáð í þjálfaramál ÍBV en Ian Jeffs og Alfreð Elías Jóhannsson tóku tímabundið við og er ljóst að Alfreð verður ekki áfram. „Ég get ekki svarað þessu,“ svaraði Jeffs aðspurður um hans framhald. „Það var sagt við okkur að klára tímabilið og við erum búnir að gera það. Markmiðið var að halda okkur í þessari deild og við erum búnir að gera það. En allt hitt er í óvissu. Ég veit ekkert.“
