Viktor Freyr Sigurðsson, ungur markvörður Leiknis, stendur í rammanum í úrvalsliðinu en hann stóð sig afskaplega vel í 1-1 jafntefli gegn ÍBV á Hásteinsvelli.

Leikur Víkings og Stjörnunnar var heimsklassa skemmtun. Stjarnan vann 5-4 sigur á heimavelli hamingjunnar. Maður leiksins var Emil Atlason sem skoraði sína fyrstu þrennu í efstu deild og var stórkostlegur. Auk hans eru Óli Valur Ómarsson og Adolf Daði Birgisson í úrvalsliðinu og þjálfarinn Ágúst Gylfason er þjálfari umferðarinnar.

„Ég á von á fjörugum leik þar sem sótt verður á báða bóga. Ég held að þessi leikur verði Bestu deildinni til sóma og verði mjög líklega einn af bestu leikjum deildarinnar," sagði Ágúst fyrir leikinn og reyndist sannspár.

Kristall Máni Ingason skoraði þrennu fyrir Víking, sérstök tilfinning að skora þrennu í tapleik. Kristall er í úrvalsliðinu.

KA vann dramatískan endurkomusigur gegn Keflavík þar sem tvö mörk komu í blálokin. Nökkvi Þeyr Þórisson skoraði tvívegis og var valinn maður leiksins. Þá er Guðmundur Magnússon í úrvalsliðinu en hann skoraði mark Fram í 1-1 jafntefli gegn ÍA.

Sjá fyrri úrvalslið:
Lið 2. umferðar
Lið 1. umferðar