Björn Bergmann mætir til æfingar í Laugardalnum í dag.
Ísland mætir Finnlandi og Tyrklandi á fimmtudag og sunnudag í undankeppni HM. Þegar hópurinn fyrir þessa leiki var opinberaður voru stærstu tíðindin að Björn Bergmann Sigurðarson, framherji Molde, er í hópnum.
„Það er rosalega gaman að vera kominn til baka. Það er langt síðan ég var hérna síðast, spilaði tvær mínútur í einum leik. Það er rosalega gaman að vera kominn til baka," segir þessi 25 ára Skagamaður sem á einn A-landsleik að baki, þá var hann tvítugur og kom inn á undir lokin í sigri gegn Kýpur.
Hugurinn á öðrum stað
Landsliðsþjálfararnir hafa viljað fá Björn inn í hópinn fyrr og eftirminnilegt var þegar Lars Lagerback sagði á fréttamannafundi að hann hefði ekki svarað símhringingum sínum. En af hverju kom Björn Bergmann ekki fyrr inn í hópinn?
„Hugur minn var á öðrum stað og svo var ég meiddur mikið. Á þessum tíma fannst mér þetta ekki vera fyrir mig. Núna finnst mér ég hafa þroskast og tilbúinn að taka meira á. Eftir langt samtal við Heimi (Hallgrímsson) var ég á því að ég vildi koma aftur."
„Ég er orðinn eldri og þarf ekki að nota tímann í annað. Að fá að koma í landsliðið í eina viku er svo sjálfsagður hlutur finnst mér núna. Hópurinn er frábær og þjálfarateymið frábært."
Stoltur af strákunum á EM
Björn Bergmann er meðvitaður um að það séu meiðsli sóknarlega hjá Íslandi. Kolbeinn Sigþórsson er meiddur og ekki í hópnum og Jón Daði Böðvarsson er tæpur.
„Ég vil fá að spila eins mikið og hægt er, ég vona það besta," segir Björn sem hefur leikið mjög vel með Molde í Noregi en þjálfari hans er Ole Gunnar Solskjær.
Í viðtali fyrir nokkrum árum opnaði Björn Bergmann sig með að hann sé ekki mikill fótboltaáhugamaður og horfi í raun ekki á fótbolta í frítíma sínum. Það varð þó undantekning á því á Evrópumótinu í suamr.
„Það hefur ekki breyst. En þegar landsliðið var á EM þá fylgdist ég með öllum leikjunum. Það var gaman að sjá hvað öllum gekk vel og maður var stoltur af landinu og strákunum."
Viðtalið má sjá í heild í sjónvarpinu hér að ofan en þar talar Björn meðal annars um Solskjær.
