Arsenal orðað við fjóra sóknarmenn - Real Madrid að sækja bróður Mbappe líka - Zidane efstur á lista Ratcliffe - Barcelona á eftir De Gea
banner
   mán 04. desember 2023 20:15
Ívan Guðjón Baldursson
Sverrir Ingi og félagar á toppinn - Elías fékk þrjú mörk á sig
Mynd: Getty Images
Mynd: Jónína Guðbjörg Guðbjartsdóttir
Mynd: NAC Breda
Sverrir Ingi Ingason var á sínum stað í hjarta varnarinnar hjá FC Midtjylland sem tók á móti Viborg í efstu deild danska boltans í dag.

Mið-Jótlendingar gátu komist á topp deildarinnar með sigri en lentu óvænt undir eftir hálftímaleik og héldu gestirnir forystunni allt þar til seint í uppbótartíma fyrri hálfleiks.

Það var miklu bætt við og tókst heimamönnum að skora tvö mörk í uppbótartímanum til að snúa stöðunni við fyrir seinni hálfleikinn.

Flóðgáttirnar voru opnar eftir þetta og bætti Midtjylland þremur mörkum við í seinni hálfleik, þar sem Cho Gue-sung skoraði tvennu á meðan fyrirliðinn Henrik Dalsgaard skoraði og lagði upp.

Þetta var sjötti sigurinn í röð hjá Midtjylland og er liðið með tveggja stiga forystu á toppi ofurdeildarinnar, með 36 stig eftir 17 umferðir.

Elías Rafn Ólafsson varði þá mark Mafra í B-deild portúgalska boltans, en fyrri hálfleikurinn var afar slæmur.

Mafra heimsótti Feirense og lenti þremur mörkum undir í fyrri hálfleik, þar sem heimamenn skoruðu úr öllum marktilraunum sínum.

Mafra var sterkari aðilinn í síðari hálfleik og náði að minnka muninn niður í eitt mark en það dugði ekki til. Lokatölur urðu 3-2 og er Mafra með 17 stig eftir 12 umferðir, átta stigum frá baráttu um sæti í efstu deild.

Að lokum vann NAC Breda góðan sigur á varaliði PSV í B-deild hollenska boltans, en Elías Már Ómarsson er fjarverandi vegna slæmra meiðsla. Breda er í umspilsbaráttunni og er markmiðið sett á að komast upp í efstu delid.

Midtjylland 5 - 1 Viborg

Feirense 3 - 2 Mafra

Jong PSV 0 - 3 NAC Breda

Athugasemdir
banner
banner
banner
banner
banner