Hamren glaðbeittur á fréttamannafundi í dag.
Erik Hamren og Freyr Alexandersson á fréttamannafundinum.
„Það fyrsta sem ég hugsaði þegar Ísland hafði samband var, áhugavert!" sagði Erik Hamren sem var í dag ráðinnn landsliðsþjálfari Íslands til næstu tveggja ára.
Hamren ræddi fyrst við KSÍ fyrir tveimur vikum og hann hefur síðan þá verið að kynna sér íslenska liðið.
„Ég var á leiknum gegn Argentínu á HM í sumar. Ég var þar með liði mínu frá Suður-Afríku. Það var góð reynsla. Ég hef síðan horft á aðra leiki í sjónvarpi og tölvu."
„Ég á eftir að kynnast liðinu betur en ég þekki nokkuð vel hvernig liðið spilaði í Rússlandi. Það eru líka leikmenn sem voru ekki í Rússlandi sem ég þarf að kynnast og ég þarf að kynnast mörgu en ég hef góða tilfinningu fyrir þessu."
Ekki miklar breytingar gegn Sviss
Í dag er nákvæmlega mánuður í fyrsta leik Íslands undir stjórn Hamren. Ísland mætir þá Sviss í Þjóðadeildinni. Hamren reiknar ekki með miklum breytingum á hópnum þar.
„Þegar við hittumst í fyrsta skipti reikna ég ekki með miklum breytingum. Flestir leikmenn í hópnum eiga ennþá nokkur ár eftir af ferlinum. Leikmennirnir sem spiluðu á HM verða auðvitað í stóru hlutverki í liðinu."
„Ég vil bæta allt, bæði sókn og vörn. Það er metnaður minn sem þjálfari. Þú vilt bæta þig á hverju ári og þú ert aldrei alveg sáttur. Það verða ekki miklar breytingar. Hugarfar mitt er þannig að það eigi ekki að breyta ef hlutir ganga vel. Það má reyna að bæta þá en ekki breyta þeim. Það er margt í leik íslenska liðsins sem ég er hrifinn af."
Ánægður með Frey
Freyr Alexandersson verður aðstoðarmaður Hamren. Svíinn er ánægður með Frey eftir fyrstu fundi þeirra.
„Þekking hans á leikmönnum landsliðsins og liðinu er mikilvæg. Þegar þú kemur í nýtt lið þá þarftu að reyna að halda í góðu hlutina. Fundirnir með honum hafa gengið mjög vel. Ég hef hrifist af honum, þekkingu hans og hungri í fótbolta. Persónuleiki hans og hugarfar er gott og ég hlakka mikið til að vinna með honum," sagði Hamren.
Belgar sigurstranglegastir
Ísland mætir Sviss og Belgíu í Þjóðadeildinni í haust og Hamren fer brattur inn í þá leiki.
„Belgar eru sigurstranglegastir í okkar riðli. Þeir enduðu í 3. sæti á HM og eru líka mjög gott lið. Allir riðlarnir í efstu deild eru mjög erfiðir. Ísland hefur áður komið á óvart minn metnaður liggur í því að koma einu sinni enn á óvart," sagði Hamren bjartsýnn.
Hér að ofan má sjá viðtalið í heild sinni.
Sjá einnig:
Hamren: Kannski stærsta áskorunin á mínum ferli
Athugasemdir
