Gestirnir frá Brighton byrjuðu leikinn betur í dag og komust yfir á 13. mínútu leiksins. Pascal Gross átti þá hornspyrnu sem fór beint á kollinn á Lewis Dunk sem stangaði boltann af krafti í netið.

Brighton leiddi í hálfleik en á 53. mínútu var Dunk aftur á ferðinni. Hann fékk að líta á rauða spjaldið eftir að hafa togað niður Fabio Silva sem var að sleppa einn í gegn.

Eftir þetta sótti Wolves og náði liðið að nýta sér liðsmuninn á 76. mínútu. Varamaðurinn Adama Traore skoraði þá með flottu skoti eftir samspil við Fabio Silva.

Wolves hélt áfram að sækja og Morgan Gibbs-White klúðraði dauðafæri þegar skammt var eftir. Það var síðan á 90. mínútu sem sigurmarkið kom.

Morgan Gibbs-White var þá aftur á ferðinni og nú klikkaði hann ekki. Hann tók nokkrar gabbhreyfingar inn í teignum áður en hann kláraði færið mjög vel. Þetta var fyrsta úrvalsdeildarmark Gibbs-White á ferlinum.

2-1 reyndust því lokatölur og er Wolves nú í tólfta sæti með 45 stig. Brighton er 15. sæti með 37 stig.