Jón Ólafur Daníelsson var kátur eftir frábæran sigur ÍBV á útivelli gegn Tindastóli í 8-liða úrslitum Mjólkurbikarsins í dag.
Eyjakonur sigruðu á Sauðárkróki og tryggðu sér þátttöku í undanúrslitunum í fyrsta sinn í átta ár. Það vekur athygli að ÍBV leikur í Lengjudeildinni og því er þetta frábær árangur fyrir liðið.
Tindastóll pressaði Eyjakonur hátt upp völlinn í dag en það reyndust mistök því ÍBV náði að leysa úr því og skapa sér hættulegar stöður.
„Við erum með hraða sóknarmenn sem við nýttum mjög vel og skoruðum fyrsta markið þannig. Við hefðum getað nýtt þetta betur þegar þær stóðu hátt á okkur en við gerðum það ekki. Það voru aðrir hlutir við okkar leik sem voru frábærir á móti," sagði Jón Óli að leikslokum.
ÍBV er í toppbaráttu Lengjudeildarinnar og heimsækir HK í toppslag í næstu umferð.
„Það verður erfitt að ná stelpunum aftur niður á jörðina, þetta lið ofmetnast við þetta og svo skítum við upp á bak í næsta leik," svaraði Jón hlæjandi en gaf svo alvarlegra svar beint í kjölfarið.
„Nei nei, það er regla hjá okkur að við tökum bara einn leik í einu og reynum að vinna hann. Næstu tveir dagar fara kannski í að ná fólki niður eftir skemmtilegt og þreytandi ferðalag. Við þurfum að ná okkur vel niður áður en við byrjum að byggja okkur upp fyrir næstu átök."
Athugasemdir
