Erik ten Hag er að stýra öðru tímabili sínu hjá United. Á síðustu leiktíð hafnaði liðið í 3. sæti og kom sér aftur í Meistaradeild Evrópu en á þessari leiktíð hefur gengið verið brösugt.

Margir varnarmenn hafa verið frá á tímabilinu og Ten Hag stillt upp mörgum mismunandi varnarlínum.

United hefur aldrei fundið taktinn en í dag gerði liðið 2-2 jafntefli við Bournemouth í leik þar sem Bournemouth verðskuldaði öll stigin. Þetta er ekki í fyrsta sinn á tímabilinu sem United er heppið að sleppa með stig, en það var svipað gegn Brentford á dögunum.

Eins og staðan er núna þá er United í 7. sæti með 50 stig, tíu stigum frá Meistaradeildarsæti.

Þegar David Moyes stýrði liðinu tímabilið 2013-2014 þá var liðið með 54 stig eftir jafn marga leiki.

Það skal þá hafa það í huga að stuttu síðar eða 22. apríl 2014 var Moyes rekinn frá United.

Sir Jim Ratcliffe er nýr hluteigandi Manchester United en hann mun væntanlega skoða stjóramálin eftir leiktíðina. Það er ekki útilokað að Ratcliffe vilji fá annan mann til að stýra liðinu á næstu leiktíð.