Selfoss tapaði í dag fyrir Keflavík og enda tímabilið í 11.sæti með 19 stig, tveimur stigum eftir Grindavík sem tapaði einnig í dag. Úrslitin því ekki góð og fall niðurstaða dagsins fyrir selfyssinga.
Jón Daði Böðvarsson kom til félagsins þann 1.Júlí og náði sjö leikjum með þeim í sumar. Í þessum leikjum skoraði hann fjögur mörk og meðal annars eina mark Selfoss í dag úr vítaspyrnu sem hann fiskaði sjálfur.
„Ég sagði við strákan eftir leik, þetta er ungt lið og að muna eftir þessari tilfinningu, hún er ekki skemmtileg en engu að síður lærdómsrík þegar þú ert að læra þig í leikinn."
Margir vonuðust að innkoma Jóns Daða í hópinn yrði alvöru vítamínssprauta fyrir fallbaráttu liðsins og markmið hans eflaust að halda heimabænum uppi í Lengjudeildinni.
„At the end of the day, er ég bara hluti af liði, auðvitað reyndi ég að gera mitt besta að vera með innspýtingu fyrir liðið. Svona er þetta lífið heldur áfram og nýr dagur á morgun."
Jón Daði skrifaði undir samning við Selfoss til 2027 en það vakna líklegast spurningar um framtíð hans nú þegar 2.deild bíður selfyssinga á næsta ári.
„Ég þarf bara aðeins að komast í burtu frá fótbolta í smástund og hreinsa hugann, síðan bara hugsar maður sinn gang aðeins."
Jón Daði Böðvarsson verður 34 ára á næsta ári og miðað við frammistöðu hans þetta tímabil vonast maður að sjá hann aftur því gæðin eru svo sannarlega tilstaðar.
