England vann góðan sigur á Króatíu í fyrstu umferð Evrópumótsins í gær. Englendingar fengu heimaleik á Wembley og gerði Raheem Sterling eina mark leiksins snemma í síðari hálfleik.
Tæplega 20 þúsund manns var hleypt á leikinn og var þetta fyrsti landsleikur á Wembley með áhorfendur síðan í nóvember 2019.
Það var ekki alveg allt með felldu því skömmu eftir upphafsflautið féll áhorfandi af pöllunum og þurfti sjúkrabíl. Hann er illa haldinn á spítala sem stendur.
Talsmaður Wembley staðfesti fregnirnar en sagðist ekki mega greina frá smáatriðum vegna persónuverndarlaga.
„Við erum að starfa náið með UEFA að rannsókn málsins," sagði talsmaðurinn meðal annars.
