Síðustu vikur hafa Kórdrengir verið í viðræðum við FH en uppi voru hugmyndir hjá Hafnarfjarðarfélaginu um að taka yfir Kórdrengi og gera þá að nokkurs konar varaliði, spila á yngri leikmönnum.

Davíð Þór Viðarsson, yfirmaður fótboltamála hjá FH hefur ekkert viljað tjá sig um málið við Fótbolta.net en staðfesti í samtali við 433.is að viðræður hafi siglt í strand og ekkert yrði af yfirtökunni.

Davíð vonar innilega að Kórdrengir haldi áfram að spila á Íslandsmótinu.

„Það er ótrúlega leiðinlegt ef Kórdrengir ná ekki að halda áfram. Ég vona innilega að þeir geti fundið lausn á þessu sjálfir," sagði Davið við 433.is.

Kórdrengir hafa undanfarin tvö ár leikið í Lengjudeildinni en þjálfari liðsins og helsti burðarás, Davíð Smári Lamude, tók við Vestra í vetur. Kórdrengjaliðið hefur auk þess misst marga leikmenn og hafa ekki staðið fyrir skipulögðum æfingum.

Það stefnir allt í að liðið taki ekki þátt í sumar og þá verður það væntanlega hlutskipti Ægis í Þorlákshöfn að taka sætið í Lengjudeildinni. Reglugerð KSÍ er þó ekki mjög skýr og er mögulegt að KV, sem féll úr Lengjudeildinni, fái sætið.

Það er mikil óvissa í íslenska fótboltanum en ljóst er að ef Kórdrengir draga sig úr keppni hefur það áhrif á mörg lið og ekki bara Lengjudeildina heldur allar deildirnar fyrir neðan. Þá hefur ekki verið dregið í bikarnum þar sem óvíst er með þátttöku liðsins.

Riðill 2 í Lengjubikarnum er í upplausn. ÍBV gat ekki spilað í fyrstu umferð vegna veðurs og Breiðablik verður búið að spila fjóra leiki í riðlinum áður en næstu skráðu leikir hjá Kórdrengjum og ÍBV eiga að fara fram.