Albert Hafsteins um Mudryk: Ég horfði á símann og fraus

Mudryk hafði verið að ýta undir sögusagnir um Arsenal með virkni sinni á samfélagsmiðlum allan mánuðinn, en svo endaði hann óvænt í Chelsea.

Chelsea lagði fram tilboðið sem Shakhtar Donetsk var að vonast eftir og í kjölfarið gengu hlutirnir hratt fyrir sig.

„Þegar handboltaleikurinn (á laugardag) var að klárast þá horfði ég á símann og mér leið eins og ég væri að missa móður mína," sagði Albert Hafsteinsson, leikmaður Fram og mikill stuðningsmaður Arsenal, í hlaðvarpinu Enski boltinn fyrr í þessari viku.

„Ég trúði þessu ekki. Ég horfði á símann og fraus. Ég er í skemmtilegu hópspjalli þar sem eru nokkrir fárveikir Arsenal-menn og við trúðum ekki okkar eigin augum. Hann er búinn að vera að gefa okkur svo mikið inn að maður hélt að þetta væri klárt."

„Ég bjóst engan veginn við þessu og þetta er rosalega sárt. Síðast þegar ég man einhverju svona var þegar við misstum Van Persie til Man Utd. Hann var einhvern veginn kominn í liðið. Þetta var ótrúlega sárt."

„Maður hélt að hann væri mættur því hann var alltaf að pósta á Instagram. Þetta er mjög skrítið," sagði Magnús Ingi Þórðarson, liðsfélagi Alberts í Fram, í þættinum.

„Þetta er greinilega einhver skítakarakter," sagði Albert síðan léttur en hann hefur trú á því að Mudryk muni gera góða hluti með Chelsea. „Arsenal hlýtur að vera með einhvern annan kláran. Maður treystir þessum gæjum."

Hægt er að hlusta á alla umræðuna í spilaranum hér fyrir neðan.