Höjlund: Ég stýrði boltanum viljandi í fjær

Í fyrra markinu nýtti hann sér slæm varnarmistök til að skora en í seinna markinu stýrði hann boltanum skemmtilega í netið með kassanum eftir misheppnaða skottilraun Alejandro Garnacho.

TENGT EFNI18.02.24 - 17:11

Sjáðu mörkin: Sjóðandi heitur Höjlund - Yngstur til að skora í sex leikjum í röð

Að leikslokum rökræddu fótboltaspekingar um hvort Höjlund hafi snúið boltanum viljandi í netið með kassanum eða hvort hann hafi ætlað að gefa boltann fyrir og verið heppinn að skora. Hojlund segist hafa verið að reyna að gera nákvæmlega það sem hann gerði.

„Ég ætlaði að gera þetta, 100%. Þið getið séð að ég sný líkamanum til að stýra boltanum í netið. Ég var hissa að það hafi gengið upp en ég er mjög ánægður. Ég er með sjálfstraustið í botni," sagði Höjlund að leikslokum.

„Þetta var erfiður og skemmtilegur leikur þar sem við fengum mikið af færum til að tryggja okkur sigurinn en nýttum þau ekki. Allir útileikir eru erfiðir í ensku úrvalsdeildinni og eins marks forysta getur verið mjög hættuleg, en sem betur fer þá sóttum við öll stigin í dag."

Þetta var fjórði sigur Man Utd í röð í deildinni og er liðið aðeins fimm stigum frá meistaradeildarsæti.

„Þetta var risastór sigur fyrir okkur í dag, við erum að nálgast Villa og Spurs og þurfum að halda áfram á þessari braut til að berjast um meistaradeildarsæti. Við erum ennþá í FA bikarnum og erum hungraðir í titla.

„Leikmannahópurinn er frábær, hérna er mikið af hágæða fótboltamönnum enda er þetta eitt af stærstu félögum heims."

Höjlund er byrjaður að skora eftir mikla markaþurrð á fyrstu mánuðunum sínum í Manchester.

„Ég efaðist aldrei um sjálfan mig og getuna mína til að skora mörk. Auðvitað var ég leiður útaf því að ég skoraði ekki en ég vissi allan tímann að þetta væri einungis tímaspursmál. Ég var að læra inn á liðsfélagana mína og núna erum við að smella saman. Ég mun alltaf berjast fyrir liðið af fullum mætti."